Може ли некаде образованието на децата да тече без учебници? Во Македонија може и тоа годинава се спроведе по неколку предмети. Македонија го издржа и тој експеримент (читај – неодговорност).
Но, сепак дека има образовен систем во земјава доказ е дека иако има само уште пет-шест наставни часа во наредниве десетина работни дена – петооделенците во основното образование ќе го користат новоиспечетениот учебник по Македонски јазик кој деновиве им беше поделен. Браво за брзото и навремено правење на учебникот. Светот може да учи од македонскиот образовен систем, а власта да држи лекции како се оди напред кон повеќе знаење.
Ако, пак, не се шегуваме, следи прашањето: Што може да научат од него и за што сега може да им послужи на крајот од школската година? Да се фотографираат со учебникот? Можеби учениците на распуст ќе учат од него?
Но, Министерството за образование сепак реши да им го подели на основците оти новиот учебник дури сега ги поминал сите процедури.
– Учебниците ги праќаме на печатење штом ќе добијат одобрение од Националната комисија за учебници дека може да се користи. Печатењето учебник е процес. Во образование има повеќе од 1.000 учебници по различни предмети. Има дел што не се испечатени. Како доаѓа одобрение за нив, така ги печатиме, информираа од МОН.
Ете тоа е образовниот систем на Македонија со кој власта се фали и вели дека успешно го реформира.
За жал, ваков не е само случај со петооделенците туку и со други основци и средношколци. Многу ученици и наставници се уште се служат со фотокопии, скрипти, со материјали преземени од интернет… Се уште се импровизира во наставата бидејќи нема учебници, прирачници и други наставни помагала. Вчера беше објавено дека целосно е повлечен и учебникот за петто одделение по Историја и општество поради бројни скандалозни грешки. Кој сега ќе гарантира дека до септември, кога ќе почне нова учебна година, ќе има новоиспечатен учебник?
Од наесен е најавено и спојување на неколку предмети што ќе бара нови учебници…
