Од следната недела ќе стартува иницијативата на ВМРО-ДПМНЕ за собирање на граѓански потписи за укинување на Законот за попис, најави вечерва потпретседателот на ВМРО-ДПМНЕ и пратеник Александар Николоски.
Николоски, при гостувањето во емисијата „Што не е јасно” на Алфа телевизија, кажа дека правната процедура е веќе започната. Овие денови ќе биде објавен датумот од кога ќе почнат да се собираат потписите за кои рокот е 30 дена. Минималната бројка, како што изјави тој, е 10.000 потписи меѓутоа тој очекува дека бројката на потписи ќе достигне 100.000.
Тој посочи дека постои политички договор за проценти помеѓу СДСМ и ДУИ, кој е штетен, затоа што ќе предизвика нереални бројки и ќе ја однесе државата во погрешен правец.
– Има јасен политички договор за пописот, тој се гледа и е помеѓу СДСМ и ДУИ, за жал во Македонија пописот одамна не е статистичка операција туку е политичка операција, особено по Охридскиот рамковен договор, кога Македонија стана држава на проценти, а не држава на граѓани кои што живеат во тука, изјави Николоски.
