Во периодот од 8 до 14 октомври од коронавирус починале 105 пациенти, а 75 % од нив не биле вакцинирани. Од вкупно починатите пациенти во овој период 26 пациенти биле вакцинирани, а само еден од починатите немал хронично заболување и имал 80 години, информира Министерството за здравство.
Двајца од починатите пациенти биле вакцинирани со вакцината на „Фајзер“, тројца со вакцината на „Астразенека“, четири починати пациенти примиле вакцина „синовак“, а 17 пациенти примиле вакцина од производителот „Синофарм“.
Според податоците од Министерството за здравство, најголем број од лицата кои биле вакцинирани и кои починале од коронавирус имале кардиолошки заболувања и дијабет. Останатите имале белодробно заболување, бубрежно заболување, невромускуларно заболување, хипотироидизам и малигно заболување.
Денеска Комитетот за имунизација донесе одлука сите кои се вакцинирале со кинеските вакцини да примат трета доза три месеци по втората, наместо шест како што е препораката за другите типови вакцини.
Со вакцината „Синофарм“, беа вакцинирани и најголем дел од членовите на Владата. Мешу нив во мај беа и премиерот Зоран Заев и министерот за здравство Венко Филипче.
