Идеја за ангажирање на учениците од 4та година од средномедицинските училишта во ковид центрите како помош на медицинскиот кадар не е безбедна за учениците и таа не треба да се примени, реагира денеска Унијата на Здруженијата на медицински сестри,техничари и акушери.
-Сметаме дека во еден ваков период кога се носат мерки за зачувување на здравјето на учениците и се препорачува он-лајн настава со цел да се намали трансмисијата во училишните клупи не е соодветна идеја малолетни ученици и недоусовршен кадар од средномедицинските училишта да биде впуштен директно во најголемите жаришта на оваа пандемија, се наведува во соопштението.
Се додава дека ризикот е многу голем.
-Во една за нас исклучително тешка ситуација со две медицински сестри на 30 пациенти, ангажман на учениците како помош дополнително би ги отежнало работите, пред се ризикот и нивната безбедност, и нашата одговорност за нив кои треба да учат – практицираат, а ние треба да ги менторираме. Учениците ако се заразат можеби ќе поминат асиптоматски, но што е со нивните најблиски? Ако е ова решение недовршени кадри да не надополнуваат ги имаме четирите високо образовни институции за идните дипломирани медицински сестри кои барем се полнолетни, изјавуваат од извршниот одбор на Унијата.
