Иако Градот Скопје е презадолжен за две години граѓаните ќе имаат бесплатен јавен превоз, а ќе се набават и електрични автобуси, изјави синоќа скопската градоначалничка Данела Арсовска. Таа на телевизија Телма рече дека сите проекти кои што се корисни за граѓаните ќе бидат спроведени.
-Средства во буџетот моментно нема, Градот е задолжен скоро 160 милиони евра, но тоа не значи дека нема да набавиме електрични автобуси. Ќе има 250 еко-автобуси. Тоа е амбициозна програма, но е и мој фокус и ќе не стави на мапата на чисти, еколошки градови. Има донатори и квалитетни фондови за оние што сакаат да се придвижат кон зелената транзиција, истакна градоначалничката.
Во однос на најавите на лидерот на ВМРО-ДПМНЕ Христијан Мицкоски за набавка на нови автобуси таа рече дека „секој еден што се обиде да донесе инвестиција во градот Скопје е добредојден“.
-И доколку лидерот на ВМРО ДПМНЕ прокажува проактивност во таа насока мени ми драго. Само на власта тендери и провизии им се вртат низ главата. Тоа не е реалноста. Реалноста е дека во овие 120 дена, никој од економските ресори од владата не пројави проактивност да донесе некаква инвестиција во градот. Ниту се јавил, ниту ме повикал, рече Арсовска.
Арсовска укажа и на тоа дека градските јавни претпријатија имаат големи долгови.
-Јавните претпријатија се презадолжени. На пример ЈСП „Скопје“ е во загуба од три милиони евра. Сега треба да се консолидира. Се трошело безумно, се трошело како да ќе нема утре, додаде Арсовска.
