Учениците од прво одделение и дечињата со попреченост во училиштата во општина Аеродром и оваа година преку проектот „Учиме да пливаме“ имаат можност да ги совладаат техниките и стиловите на пливањето, целосно бесплатно, овозможено со средства од локалната власт, соопшти оваа скопска општина.
Како дел од проектот, учениците добиваат часови од стручни лица и целосна опрема за пливање.
Во информацијата се наведува дека инклузивноста и здравиот начин на живот се важни за оваа општина во Аеродром, а задоволството на родителите и радоста на дечињата се доволна потврда.
-Со проектот ги рушиме стереотипите на административното работење и грижата за најмладите ја ставаме високо во нашите приоритети. Пливањето овозможува тренинг за целото тело и го активира умот, а преку конкретниот проект, освен физичкиот развој, успеваме дечињата за момент да ги оттргнеме од секојдневните обврски и дигиталната технологија, стекнувајќи нови спортски и моторички вештини. Поддршката за спортот и здравиот живот продолжува и понатаму, со проекти и активности во различни спортски дисциплини, велат од Аеродром.
