Сериозна клевета е која нема ни трошка вистина во себе бидејќи ние како монашка заедница сме нераскинлив дел од нашата најсвета Црква, на којашто доброволно сме ѝ ги посветиле своите животи во жртва и послушание, соопшти братството на Бигорскиот манастир на МПЦ-ОА. Рекацијата доаѓа откако митрополит Преспанско-пелагониски Петар, прексиноќа во интервју за ТВ „Сонце“ изјави дека „постои парацрковна структура во Бигорскиот манастир, на чело со епископот Партениј“, која според него „ѝ задава голем проблем на МПЦ-ОА“.
Од манастирот чиј старешина е епископот Партениј во соопштението потенцираат дека владиката Петар јавно злословеше и си земал за слобода да критикува епископ и манастир што не се во негова надлежност.
– Тој владика инсинуира мислење дека ние сме небаре предавници и кривоверци, бидејќи, според неговите зборови, имало „проблем со парацрковната структура на Бигорскиот Манастир, кои и по националноста знаеме кај тргаат, и по нивната духовна ориентација и така натаму“. Во врска со „нашата духовна ориентација“, ќе ги потсетиме загрижените дека ние сме православна монашка заедница, која верува и ги исповеда догмите на едната, света, соборна и апостолска Црква, учењето на Светите Отци на Православната Црква и одлуките на Вселенските Собори. А во однос, пак, на нашата националност – иако и ова прашање влегува во делот од интимата на секоја личност – ние, сепак, за да нема дополнителни недоразбирања, јавно објавивме дека своето граѓанско право на изминатиот попис го исползувавме, за да ја декларираме својата македонска национална припадност. Според правните дефиниции, ваквиот настап на Митрополитот се толкува како говор на омраза и како поттик и повик за јавен линч – нешто што не му приличи на еден духовен водач и подлежи на кривична одговорност, потенцираат од Бигорскиот манастир.
Оттаму потсетуваат дека ваквите повеќекратно изнесени невистини во јавниот дискурс, придонесуваат за создавање на неединство, конструираат дух на осуда – што не е прифатливо и е спротивно на православниот етос и значат неоснована деградација и дискриминација на нашите манастири пред јавноста, но се и повод за поделба и раскол меѓу верниците во Црквата.
– Делата на Епископот Партениј и на Бигорскиот Манастир говорат токму за спротивното – духовното и материјално градење на нашата најсвета Црква, што е многупати посочувано и во беседите на нашиот свет Претстојател, Неговото Блаженство Архиепископот Охридски и Македонски г. г. Стефан, како и на нашиот почитуван надлежен архијереј, Неговото Високопреосвештенство Митрополитот Дебарско-кичевски г. Тимотеј. Не можеме да го сметаме за мешање во туѓа епархија помагањето на луѓето, коишто отуѓени од духовното, во Бигорски нашле спас и поттик за Христа. Впрочем, тоа наше дело во слава Божја е принос за целата Црква. А тоа што некои од монасите и монахињите се по потекло од градови од други епархии и таму имаат свои родители, роднини и пријатели – нивно лично и приватно право е да ги посетуваат и слободно да се движат, што, се разбира, не значи и некаков канонски прекршок, бидејќи ниту сме се мешале, ниту сме имале интерес од мешање во туѓите епархиски работи, нагласува манастирско братство.
Ти ги повикуваат верниците на смирение, љубов и молитва, како би ја вкусиле благодатта од прекрасниот празник на Просветлението – Богојавление.
-Непријателот на човечкото спасение – ѓаволот, секогаш пред и за време на големи празници подметнува големи искушенија, со цел да ги одвлече верниците од правилното и мирно славословење на Бога. Но, важно е ние да не му даваме простор да дејствува во нас, туку да се молиме во мир, покајание и љубов за сите, порака е од Бигорскиот манастир.
