Јадат ли македонските граѓани безбедна храна, има ли во доматите, краставиците, младиот кромид и пиперките прекумерна доза на пестициди? Ваков сомнеж и стравување се прошири деновиве откако од опозициската ВМРО-ДПМНЕ обвинија дека надлежните државни органи – Министерство за земјоделство и Агенција за храна и ветеринарство – свесно дозволиле на македонските пазари да се продава затруен зеленчук. Цветан Трипуновски, претседател на партиската комисија за земјоделие на двапати покажуваше и документи од кои се гледаат анализи на зеленчукот кај кој е откриено дека има недозволено многу хемикалии кои се штетни за шовековиот организам.
Агенцијата за храна, пак, излезе со тврдењето дека тоа не е вистина, дека имало такви анализи, но од примероци за кои не се знае од каде се земени, но не биле од оние контигенти коишто се увезуваат…
Сето ова е доволно граѓаните да бидат збунети и по малклу подисплашени – да не знаат дали зеленчукот што го купуваат по маркетите и зелените пазари е сигурен и здрав за исхрана. Значи, постои опасност да купат затруен зеленчук и да се затрујат и самите.
Од друга страна лошо е и за чесните производители оти ако граѓаните се откажат од купувањето, со тоа на нив им се прави штета.
Ваква ситуација е неодржлива. Сомнежите и стравувањата мора да се расчистат. Надлежните мора да излезат со точни информации и вистина околу обвинувањата на опозициската партија. На јавноста мора јасно да и се каже од каде потекнува затруениот зеленчук за кој постојат документи дека анализите покажале дека е нездрав. Мора да се соопшти каде е тој зеленчук и каква е негова судбина? Само на таков начин граѓаните ќе бидат сигурни дека она што го наоѓаат на тезгите е проверено и сигурно за јадење. Во спротивно, може да се случи затруените контигенти да завршат во организмите на граѓаните со сите опсани последици.
Од друга страна, и опозициската партија кога изнесува обвинувања мора појасно да укаже за какви контигенти станува збор – дали се работи токму за големи контигенти од увоз или за помали количества. Во партијата имаат комисии за земјоделство нека поработат малку посеопфатно, нека дојдат до повеќе податоци и нека ја притиснат власта да си ја работи работатат за која е дебело платена.
Во спротивно едните ќе одржат прес конференција дека има затруена храна, другите ќе кажат дека тоа не е вистина и граѓаните во страв или не ни знаејќи ќе го изедат она што им се сервира.
Е така ли ќе имаме здрава нација?