Се подготвувам за Самитот на НАТО, мојата позиција за употребата на името е јасна и никој за тоа не треба да има дилема, изјави денеска Христијан Мицкоски, мандатарот за состав на новата македонска влада. Прашан за коментар за изјавата на грчкиот премиер Кирјакос Мицотакис дека „премиерот на Северна Македонија, ако од моментот кога ќе ја презеде должноста, инсистира на оваа реторика, ќе се најде во многу непријатна позиција, кога ќе се сретнеме на НАТО Самитот“, Мицкоски рече дека се подготвува и оти би сакал да го види тој предизвик потсетувајќи на изјавите дека досега требаше да почне ратификацијата на протоколот за влез на Македонија во рамките на ЕУ.
-Се подготвувм јас. Јас сум човек кој се подготвува и сака предизвици. Би сакал да го видам и тој предизвик. Мојата позиција е јасна и тука не треба никој да има дилема. Доколку постојат во Европа а не верувам дека постојат европски политичари кои се претставуваат како европски политичари на 21 век а сепак имаат во себе талибански мотиви па сакаат да го загрозат човековото право кое што е заштитено со многу меѓународни конвенции тогаш јас сум подготвен со тие луѓе да аргументирам и да дебатирам и тука не треба да имаме никаква дилема. Мојот интерес е да градиме мостови а не да ги уриваме и да разговараме врз основа на аргументи, врз основа на факти, рече тој.
Мицкоски додаде дека е подготвен и со аргументи и со факти да разговара.
-Тоа го правам целиот мој живот, не само на НАТО самитот. Каде и да е, и во Атина, и во Скопје и во Брисел… Секаде сум подготвен да разговарам со факти и со аргументи. се додека има манипулации и двојни стандарди и додека не се држиме до Копенхагеншките критериуми ќе ни се случуваат вакви анахрони изјави, талибански методи и враќање во средниот век, наместо да се гледа во иднината. Ние денеска ако ги слушавме тие пораки веќе требаше да отпочне ратификацијата на протоколот за влез на Македонија во рамките на ЕУ, бидејќи се сеќавам дел од политичарите кои што се сега гласни за Преспанскиот договор седеа пред мене пред шест години ме гледаа во очи и ми велеа само уште ова Христијан нека помине и за пет-шест години вие сте дел од Европската унија. Би сакал истите тие да ги погледам во очи и да им кажам сега јас што имам да им кажам, бидејќи и тогаш им кажував и сега истото ќе им го кажам дека се нечесни, дека даваат лажни изјави и дека го манипулираат овој мал, но драг, скапоцен народ во срцето на Балканот. И се додека има манипулации и двојни стандарди и се додека не се држиме до Копенхагеншките критериуми и вредностите дефинирани од тројцата многу важни луѓе за Европската унија Де, Шуман и Аденауер нас ќе ни се случува вакви анахрони изјави, талибански методи, и враќање во средниот век, наместо да гледаме во иднината, потенцира мандатарот.
Мицотакис во интервју за радиото „Реал фм“ за ставот на мандатарот за формирање влада Мицкоски околу употребата на името Македонија, вели дека „премиерот на Северна Македонија, ако од моментот кога ќе ја презеде должноста, инсистира на оваа реторика, ќе се најде во многу непријатна позиција, кога ќе се сретнеме на НАТО Самитот“.
