Судењето во случајот „Шпански скали“ тргна одново на денешното рочиште. Причина е што истекле 90 дена од последното одржано рочиште. Првообвинетиот, поранешниот министер за транспорт и врски, Миле Јанакиевски, на повторните воведни зборови рече дека не се чуствува виновен и дека докрај не му е јасно обвинението.
Слични изјави дадоа и другите обвинети кој меѓудругото посочија дека не им е јасно за што се обвинети.
Како застапник на обвинението во овој случај е јавната обвинителка Ивана Трајчева, а судењето го води судијата Владимир Туфегџиќ. Во случајот „Шпански скали“, покрај ексминистерот Јанакиески, обвинети се Димитар Димовски, Билјана Дејановска-Димитровска, Виолета Самарџиска, Анета Јорданова, Дејан Митевски, Емилија Радојкова, Снежана Крстевска, Ристо Папазов, Лидија Смиљановска и Марјан Јованов.
Тие се товарат дека со незаконската продажба на парцелите пред зградата на ЕВН на плоштадот во Скопје, ја оштетиле државата за 2,6 милиони евра.
