Лажна е и лицемерна наводна загриженост на Христијан Мицкоски за предлогот на француското претседателство, соопшти СДСМ.
Владеачката партија реагира на предлогот на лидерот на опозициската ВМРО-ДПМНЕ да се формираат работни групи во Собранието на Македонија коишто ќе го разгледуваат францускиот предлог.
-Иако во текот на процесот му беше понудено, Мицкоски одби ВМРО-ДПМНЕ да учествува во работните групи за спорот со Бугарија. Секогаш кога државата е во клучни процеси за европската иднина, Мицкоски и ВМРО-ДПМНЕ стојат отстрана, шират лажни вести и нанесуваат штети на државните позиции и интереси, се наведува во соопштението.
СДСМ додава дека така е и сега кога имаме предлог за почнување преговори со ЕУ со кој добиваме чиста формулација на македонскиот јазик, без фусноти, кога историските прашање веќе не се дел од преговарачкиот процес.
-Кога во тек е широк и инклузивен процес на консултации, Мицкоски дава задоцнети предлози и организира насилни протести. Одново на дело докажува дека за него воопшто не се битни интересите на државата и граѓаните, туку тој свесно дејствува за нечии туѓи интереси, се наведува во партискиот став.
