Премиерот и лидерот на СДСМ Зоран Заев го додаде и скопскиот градоначалник Петре Шилегов на неговата лична листа на фаворити кои ќе ги поддржи за повторна кандидатура на претстојните локални избори.
–За Шилегов имам пофални зборови, за мене е фаворит, иако се уште не сум го прашал дали ќе се кандидира на претстојните локални избори, изјави Заев на денешната промоција на реконструкцијата на Универзална сала.
Петре Шилегов, кој беше присутен на прес-конференцијата, неодамна најави дека планира да се кандидира за уште еден мандат. Меѓутоа тој не беше спомнат од страна на Заев кога лидерот на СДСМ пред две недели за првпат спомена десет актуелни градоначалници од кои е „исклучително задоволен“. Тој ги наведе првите луѓе на Валандово, на Дојран, на Богданци, Демир Капија, Конче, Кочани, новиот градоначалник на Штип, Старо Нагоричани, Крушево, Маврово Ростуше…
Заев, сепак, рече дека во текот на летните месеци ќе се спроведе партиски процедура за избор на кандидати за градоначалници.
