Новото градско раководство на Скопје се враќа онаму каде што требаше да продолжи пред 2 години, коментира дненеска поранешниот скопски градоначалник Петре Шилегов. Во објавата на неговиот профил на Фејсбук тој реагира на денешната најава на Градот Скопје дека почнува реализација на проектот за Брз автобуски превоз. Овој проект, познато е, во јули 2021 година го промовира Шилегов, а во октомври истата година распиша и тендер за негово изведување со кредитот од ЕБОР од 70 милиони евра.
Шилегов во објавата наведува дека е загубено драгоцено време.
-После 2 години однесување како вошка во перика, заради очигледната некомпетентност, немање визија и основно познавање, новото градско раководство се враќа онаму каде што требаше да продолжи пред 2 години. Реализација на целосно разработен проект со обезбедена финансиска констукција, одобрен од меѓународната и домашна стручна јавност како најоптимално решение за Скопје. Фрлањето прашина во очи “со отклонување на грешките на претходното градско раководство”, не го разбирам како ништо друго, освен како очаен обид да се обезбеди алиби за сопствената глупост. Впрочем, 2 години сме сведоци дека незнаењето го кријат со перманентен конфликт и караници со секого, вклучително и со сопствените директори. Загубените 2 години (досега ќе беше во полн ек изградбата) и парите кои како камати се платени во меѓувреме, за жал, повторно паѓаат на грбот на Скопјани, потенцира екс-градоначалникот Шилегов.
