Компанијата на Џаред Кушнер, зет на поранешниот американски претседател Доналд Трамп, бесплатно ќе го закупи просторот на бомбардираниот Генералштаб во Белград на 99 години, а ќе изгради и луксузен хотел и станбен комплекс, како и спомен обележје и музеј на тој локалитет, пишува „Њујорк тајмс“, а пренесе Н1. Инвестицијата, како што се наведува, е вредна 500 милиони долари, а државата Србија, според предлог-договорот, треба да добие 22 отсто од добивката.
„Њујорк тајмс“ пишува дека аранжманот за просторот на бомбардираниот Генералштаб, што компанијата на Кушнер ќе го направи со Владата на Србија, следи по претходниот интерес на Доналд Трамп за таа локација. Според меморандумот меѓу тимот на Кушнер и Владата на Србија, просторот каде што се наоѓа комплексот на Генералштабот на ЈНА, односно поранешното Министерство за одбрана на Југославија, кој беше бомбардиран од НАТО во 1999 година, би бил даден под закуп на инвестициската компанија на Кушнер на 99 години, бесплатно.
Според нацрт-договорот, кој на американскиот весник му го дал српски функционер, Кушнер ќе има право на местото на Генералштабот да изгради луксузен хотел и апартмански комплекс, како и спомен облежје и музеј.
Ричард Гренел, кого Трамп еднаш го назначи за специјален пратеник за Балканот, за време на мандатот на поранешниот претседател го охрабри планот Србија и САД заедно да ја ревитализираат поранешната локација на Генералштабот.
– Чест ни е што сме партнери со Србите за да ја претвориме оваа локација во повеќенаменски проект од светска класа, чиј центар беше Меморијалот, како место за сеќавање на неговата историја – рече поранешниот специјален пратеник на тогашниот американски претседател Доналд Трамп, додека беше претседател на САД, за денешниот весник Политика, на прашањето за планот на Џаред Кушнер да ја „ревитализира“ зградата на Генералштабот.
Тој истакна дека е „возбуден од исчекувањето да се видат идеите што ќе ги претстават српските експерти, така што на оваа локација ќе им се оддаде почит на оригиналниот архитект, зградите, емоциите и патриотизмот“.
– Идејата за Мостот на пријателството е емотивен дел од дизајнот кој ги истакнува оригиналните градби и е потсетник на визијата на архитектот Никола Добровиќ – рече Гренел.
Џаред Кушнер во интервјуто во неделата, меѓутоа, рече дека никогаш не разговарал за белградскиот проект со Трамп и дека не бил свесен за неговиот претходен интерес за развој на локацијата на поранешниот Генералштаб. Кушнер во петокот потврди дека неговата инвестициска фирма води бизнис во Србија, како и проекти за луксузни недвижности во Албанија и дека очекува тие договори наскоро да бидат финализирани.
Предлогот на Гренел од 2020 година за реконструкција на бомбардираниот комплекс на Генералштабот следеше, според официјални претставници на српската влада, веднаш откако Трамп го угости Александар Вучиќ, претседателот на Србија, во Белата куќа, кога беше потпишана Вашингтонската спогодба со Белград и Приштина.
Пред 25 години, силите на НАТО, предводени од САД, воено интервенираа за да ги заштитат косовските Албанци од силите на Слободан Милошевиќ. Поранешниот Генералштаб на војската на Југославија во центарот на Белград, иако во тоа време главно не беше користен, беше една од целите. Оттогаш зградата е во урнатини и Србите, според американскиот весник, ја гледаат како симбол на нивните страдања за време на бомбардирањето на НАТО.
Нацрт-договорот доставен до Тајмс од српски владин функционер, исто така, ја објаснува опцијата за формално бесплатно пренесување на сопственоста на имотот на компанијата на Кушнер, по изградбата на хотелскиот комплекс и луксузните станбени единици. Во изјава за американските медиуми Кушнер не ја оспори вистинитоста на документот до кој дојде Тајмс. Тој откри дека страните привремено се договориле на Владата на Србија да ѝ дадат 22 отсто од остварениот профит од проектот, чија вредност е околу 500 милиони долари.
Компанијата на Кушнер, Affinits Partners, објави дека локацијата во Белград ќе биде „претворена во луксузен хотел од светска класа“, вклучувајќи музеј и спомен обележје дизајнирано од српски архитекти, за да се одаде почест на важноста на локацијата за поновата српска историја.
