Ако секој втор уписен рок за идните студенти, до пред неколку години, беше голем проблем бидејќи местата на речиси сите факултети во Македонија беа пополнети, сега имаме целосно спротивна и разочарувачка ситуација.
Имено, во овој момент, четири факултети во земјава нудат по околу 1000 слободни мести за вториот уписен рок. Тоа се Природно-математичкиот (ПМФ), Филолошкиот, Правниот факултет и ФИНКИ, при УКИМ. Се работи за 4.535 места за бруцоши или 41,53 отсто од вкупно 10.918 предвидени во Конкурсот.
Причината за ваквата состојба е повеќе од јасна: младите се иселуваат од државата. Излевањето на млади умови е постојан проблем што непрестајно расте, и ако порано мнозинството во текот на студирањето или на крајот заминуваа, сега очигледно тоа го прават уште пред да се запишат на факултет.