ЈП „Лајка“ денеска организира отворен ден и ги повикува граѓаните да вдомат куче од 105-те кои привремено ги има во стационарот.
-ЈП „Лајка“ во моментов е времен дом на 105 кучиња, сите посебни по својот карактер, изглед и карактеристики. Но едно нешто важи подеднакво за сите – на секое бескрајно му треба љубов, семејство, дом, соопшти претпријатието.
Од „Лајка“ сметаат дека многумина не се доволно информирани за судбините на бездомните животни и причините зошто се тие на улица и наведуваат дека причинители за нивната прекубројност се неодговорното сопствеништво, неконтролираното размножување и напуштањето.
-Животните на улица се осудени на тежок живот, секојдневие исполнето со страв, трауми, глад, предвремена, најчесто насилна смрт. Но, хуманоста е „заразна“, а една позитивна приказна влијае и менува многу. Со вашата одлука вие спасувате еден живот, а притоа давате позитивен пример на сите останати, велат од ЈП „Лајка“.
За да вдомат куче, граѓаните може да го посетат стационарот или да ги контактираат вработените во ЈП „Лајка“ на е-адресата [email protected]. На нивната фејсбук-страница може да ги разгледаат кучињата што се објавени за вдомување.
