Европската комисија одобри нова финансиска поддршка од 65,7 милиони евра за Македонија во рамки на Инструментот за реформи и раст, по позитивната оценка за спроведените реформи во образованието и дигитализацијата до крајот на 2025 година.
Од вкупната сума, 30,6 милиони евра ќе бидат префрлени директно во државниот буџет како поддршка за реформите во основното и средното образование, како и за развој на дигиталната инфраструктура во училиштата.
Останатите средства ќе се реализираат преку Инвестициската рамка за Западен Балкан и ќе бидат насочени кон проекти за чиста енергија, одржлив транспорт и развој на човечки капитал.
Првиот заменик-претседател на Владата и министер за европски прашања, Беким Сали, оцени дека оваа одлука претставува значаен сигнал за доверба и признание за реформската агенда што ја спроведува државата.
Со оваа трета исплата, вкупната поддршка што Македонија досега ја добила преку овој инструмент достигна 142,1 милион евра.
Инструментот за реформи и раст е дел од Планот за раст на Европската Унија за Западен Балкан, вреден 6 милијарди евра, чија цел е постепено интегрирање на регионот во Единствениот европски пазар уште пред официјалното членство во Унијата.
