Испитот на зрелоста матурантите годинава ќе почнат да го полагаат на 27 мај, објави Државниот испитен центар. Тогаш е предвидено да се полагаат македонски јазик и литература, албански јазик и литература и турски јазик и литература, а на 10 јуни математика, англиски јазик, француски јазик, германски јазик, руски јазик, филозофија, естетика. Но, она што е неизвесно дали просветните власти ќе го скратат материјалот за учење поради часовите што учениците ги изгубија заради лажните дојави за поставени бомби, но и заради продолжениот распуст. Такви анализи се правеле во ДИЦ но одлуката се уште не е донесена.
Второто полугодие од наставната 2022/2023 наместо на 18, почна на 23 јануари. Учебната година ќе заврши на 14, наместо на 9 јуни 2023.
Министерот за образование и наука Јетон Шаќири неодамна изјави дека целосно ќе се реализира наставната програмата и целосно ќе се реализира сѐ што е предвидено во датумите за државната матура и во делот за предвидените испити од матурата.
Од Унијата на средношколци в недела ќе одржи генерално собрание, на кое ќе се одлучува што ќе бараат матурантите од надлежните да направат за да им го олеснат полагањето на испитот на зрелоста.
