Поројниот дожд во Скопје пак ги потсети надлежните на неколкуте подвозници во градот кои не се подготвени за поинтензивно врнење. Длабока насобрана вода, запушени решетки за одвод, заглавени и потопени возила… сето тоа се случуваше вчера попладне на подвозникот кај поранешната стоковна куќа „Мост“ каде во вода остана заглавено дури и возилото на итна помош.
Зошто ова не се реши потемелно?
Возилата заглавуваа и кај подвозникот во Црниче, кај хотелитет „Континентал“, кај „Александар палас“… може слободно да се каже дека овие неколку подвозници се најневралгични точки во градот при секое поголемо невреме и дека ги загрозуваат граѓаните.
Вчерашната опомена ќе ги растрча ли надлежните да бараат чаре?
Едноставно, проектираниот систем за одводнување на водите не е доволно добро направен и при секој посериозен дожд си ги покажува мааните. Така е со години.
Во периодот кога скопски градоначалник беше Коце Трајановски се извршија одредени поправки, се доградија нови одводни места на погорните делови на подвозниците. Но, се покажа дека и тоа не е доволно. Што направи градоначалникот Петре Шилегов по тоа прашање сега веќе е и касно да се прашува. Сега е важно градоначалничката Данела Арсовска да прави нова корекција, ново решение за одводните води.
Доколку се остане како што е и сега повторно ќе бидеме сведоци на исти ситуации и глетки со поплавени возила и загрозени граѓани. Решенија сигурно има, само надлежните треба посериозно да му пристапат на проблемот.