Намерата на власта да направи уставни измени стои во место. Наметнатата иницијатива не е прифатена од опозицијата. Не е прифатена и од значајното мнозинство од граѓаните во Македонија.
И сега, власта само нешто црта на табли и објаснува дека операцијата немало да боли, само нешто повикува на консензус и светла иднина, само нешто обвинува дека сите кои нема да клекнат на ултиматумот се против ЕУ и напредокот на Македонија, само нешто…
Последно е дека премиерот Димитар Ковачевски побара (по кој знае кој пат) национален консензус за уставните измени.
-Пратениците сега имаат, би рекол најважна задача, а тоа е да обезбедат европска иднина и перспектива на земјата на граѓаните кои им го дале мандатот. Не само Владата, не само опозицијата, туку целото општество, треба да сме посветени на евроатлантските интеграции. Потребен ни е национален, општествен консензус за конечно да ја постигнеме стратешката цел, апелира Ковачевски.
Да национален консензус е потребен. Но, зошто тој не се правеше пред да се прифати од власта контроверзниот француски предлог? Зошто власта ги игнорираше илјадниците граѓани кои со денови протестираа и опоменуваа дека власта ќе направи непромислен потег со тешки последици за Македонците?
Од ВМРО-ДПМНЕ нагласуваат дека остануваат на ставот – консензус за уставни измени под бугарски диктат не е можен и оти единствено е можен консензус за избори. Од партијата во прилог на својот став наведуваат и дека „над 80 проценти од граѓаните, јавноста и експертите се против промена на Устав под бугарски диктат“.
Граѓаните се загрижени дека власта ита кон провалија, а не обезбедила никаква заштита околу тоа Македонија да не мора по смената на уставот да менува и учебници и историски наративи и…
-Нема да има крај на странските диктати, вели мнозинството во Македонија.
Но, власта упорно повикува на заедништво за да се смени Уставот и уверува дека немало да има нови услови од Бугарија.
Кога нема да има нови услови? Пред конечно да се добие фамозниот датум и почнат преговорите или до крајот на процесот и влезот на Македонија во ЕУ? Ова во иронија го прашуваат граѓаните на социјалните мрежи.
Тие и го даваат одговорот: СДСМ зарем не ги слушна пораките на бугарските државници од Илинден?
И така, консензусот се чека. Се чека и власта да научи како се прави консензис. Оти дефинитивно заедништво не се прави ако Владата нешто самата си одлучи, а потоа да бара опозицијата и народот згружено да и ракоплескаат.