Почина Ленче Делова, истакната македонска театарска, филмска и телевизиска актерка, чие име повеќе од половина век беше нераскинливо поврзано со сцената на Драмски театар – Скопје.
Родена на 15 јуни 1948 година во Скопје, Делова својот актерски пат го започнала уште во 1964 година како аматер на сцената на тогашниот Драмски младинско-детски театар. Имала само 16 години кога првпат застанала на сцената која подоцна ќе стане нејзин втор дом.
Во 1970 година се вработила во Драмски театар – Скопје, каде што останала до пензионирањето во 2013 година, оставајќи зад себе богато и значајно уметничко наследство.
Со препознатлива емоција, длабочина и суптилност во интерпретацијата, Делова остави силен печат во македонскиот театар. Нејзината Офелија во „Хамлет“ ѝ ја донесе наградата „13 Ноември“ во 1978 година, а за улогата на Трајанка во „Ни ќар – ни зијан“ ја доби наградата за најдобро глумечко остварување на МТФ „Војдан Чернодрински“ во Прилеп во 1996 година. Во 2006 година ѝ беше доделена и наградата за животно дело „Војдан Чернодрински“, како признание за нејзиниот огромен придонес во македонскиот театар.
Покрај сцената, Делова остави значајна трага и на филмското и телевизиското платно. Се појави во бројни телевизиски филмови и серии, меѓу кои „Итар Пејо“, „Илинден“, „Чук Чук Стојанче“, „Македонски народни приказни“ и „Светот има осум страни“, како и во филмовите „Диво месо“, „Тетовирање“, „Пред дождот“, „До балчак“ и многу други. Нејзиното присуство беше симбол на квалитет и професионализам во различните етапи од развојот на македонската сцена. 
Ленче Делова буквално го живееше животот низ театарот. Нејзината животна приказна се испреплетуваше со приказните што ги оживуваше на сцената — од младински ентузијазам до зрела актерска мудрост.
Со нејзиното заминување, македонската културна сцена губи силна и достоинствена уметничка фигура, а публиката – едно препознатливо лице што со децении ја освојуваше сцената.
