По првпат по повеќе од 15 години, односно од кризата во 2008 година, годинава повторно ќе има масовни отпуштања на работници во градежната индустрија во Германија. Се проценува дека поради кризата во станоградбата, околу 10 илјади луѓе ќе останат без работа, објавија германските медиуми.
Очекуваме дека околу 10.000 работници ќе треба да бидат отпуштени во наредните месеци, изјави за германската новинска агенција „ДПА“ Тим-Оливер Милер, генерален директор на здружението за градежна индустрија ХДБ.
Тоа влијае на оваа индустрија. Според истражувањето спроведено меѓу членките на ХДБ, 55 отсто од 450-те анкетирани компании очекуваат нивниот профит да се намали во 2024 година, при што 60 отсто од компаниите сакаат да ја задржат работната сила на сегашното ниво, 12 отсто да го зголемат бројот на вработени, а речиси една третина (29 отсто) сакаат да укинат работни места.
Според ХДБ, 927.000 луѓе биле вработени во градежната индустрија во 2023 година. Укинувањето на околу 10.000 работни места опфаќа само околу еден процент од работните места во индустријата.
– Предвидувањата сепак се загрижувачки, бидејќи се очекува дека во 2030 година ќе има недостиг од околу 120.000 остручени работници во градежната индустрија, само поради демографските промени, изјави генералниот директор на ХДБ Милер.
Со оглед на зголемените каматни стапки и зголемените трошоци за градежни материјали, изградбата на станови во Германија стагнира: Институтот Ифо очекува да се изградат само 225.000 станови во 2024 година, во споредба со проценетите 270.000 минатата година. ДЗ банка исто така забележува тренд на намалување: до 2025 година, бројот на завршени станови на годишно ниво би можел да се намали на 200.000 станови.
