Ја разбирам евро-комесарката, таа требаше да го помине „хирингот“ на кој требаше да гласаат и европратеници од нашиот источен сосед и тоа е во рамките на таа димензија. Мислам дека низ таа оптика ги гледаше тие пораки и јас ги гледам истите. Убеден сум дека во периодот што следи, низ заеднички разговори, конечно, по 2,5 децении патот на Македонија до полноправно членство во ЕУ ќе биде широко отворен и ќе се вреднува врз основа на постигнувањата и компетенциите, а не поради билатерални прашања. Убеден сум дека ќе успееме, рече денеска премиерот Христијан Мицкоски, во врска со изјавата на еврокомесарката Марта Кос, според која, земјава треба да ги спроведе уставните измени.
Мицкоски порача дека „мора да не биде и ќе не биде“, а ваквиот оптимизам го темели на сите досегашни средби со релевантните светски лидери, реализирани во изминатите речиси пет месеци.
Разговорите со францускиот претседател Макрон, тој ги квалификува како суштински дијалог. На средбата во Будимпешта со Макрон, тој рече дека разговарале не само за македонските евроинтеграции, туку и за многу заеднички проекти во областа на економијата, инфрастурткруата, здравството,…
-Кога би заокружил сето за помалку од пет месеци, можам да им порачам на граѓаните дека мора да не биде и ќе не биде. Да бидеме оптимисти. Успеавме да се сретнеме со сите релеватни светски лидери за толку кратко време, нешто што порано не беше можно ниту во едне мандат. Видов натписи на одредени портали кои ја поддржуваат работата на опозицијата, и како моите средби ги споредуваат со средбите на други лидери во околината, но кога би ја објавувал секоја слика со секој со кого ќе се поздравам, би изгледало тривијално. Мислам дека е покорисно да се објавуваат вистински, суштински средби во кои има суштински дијалог. Таква беше средбата со францускиот претседател. Покрај прашањата поврзани со ЕУ интеграцијата на нашата земја, зборувавме и за соработката во економијата, имаме многу проекти во инфраструктурата, здравството кои ни се важни и кои како влада со влада може да ги реализираме, комуникацијата продолжува, дента имавме можности често да бидеме заедно и да разговараме за многу отворени теми, истакна Мицкоски по увидот во градежните работи на три делници кај Велес.
