Македонија ќе учествува на Европското ракометно првенство на почетокот на 2024 година во Германија, а првиот натпревар ќе го има 10-ти јануари. Интересот кај македонските навивачи за билети од натпреварите е голем, но од Ракометната федерација соопштуваат дека билетите за сите натпревари се веќе распродадени.
– Ве известуваме дека до Ракометната Федерација на Македонија секојдневно пристигнуваат барања за билети за претстојното Европско ракометно првенство во машка сениорска конкуренција, кое ќе се одржува во Германија во период од 10ти до 28ми јануари 2024 година.
Ракометната Федерација на Македонија, односно машката сениорска репрезентација е учесник на претстојниот спортски настап, согласно регулативата на Европската ракометна федерација правата за продажба на билети за европски спортски настани се кај домаќинот на првенството, во овој случај тоа е ракометната федерација на Германија и нивниот организационен комитет.
Европската ракометна федерација преку своите медиумски соопштенија уште во месец мај 2023 година, објави дека има огромен интерес за билети за претстојното првенство и дека половина од билетите за натпреварите во продажба се веќе распродадени, особен интерес и побарувачка за билети имаше во групата А каде настапува и македонската сениорска репрезентација, бидејќи во група А се наоѓа и домаќинот Германија.
Од страна на организаторот преку онлајна мрежата за продажба, во месец септември 2023 година беа пуштени во продажба и последните слободни 10.000 билети, кои во екстремен брз временски рок беа распродадени.
Ве молиме бидете информирани дека билетите за натпреварите во Група А каде настапува и македонската репрезентација, по добиената информација од страна на ракометната федерација на Германија и нивниот организационен комитет се распродадени, се вели во соопштението Ракометна Федерација на Македонија“, објави РФМ.
Македонските ракометари се во групата со домаќинот Германија, Франција и Швајцарија.
