Ученици на ОУ „Исмаил Ќемали” од Чаир денеска организираа комеморативен марш од училиштето до Плоштадот Скендербег, за да им оддадат почит на загинатите соученици во вчерашната автобуска несреќа во Бугарија.
-Трагедија е за едно училиште да загуби пет ученици, рече директорката на ОУ „Исмаил Ќемали”, Бурбуќе Имери.
Пет дечиња од ова училиште се меѓу загинатите 46 лица во трагедијата во Бугарија- две од деветто одделение, едно од осмо одделение, едно од шесто одделение и едно девојче од второ одделение.
Пред завршување на маршот учениците положија цвеќе пред скалите на Плоштадот Скендербег во спомен на загинатите и посакаа овој трагичен настан да биде последен и во иднина да не се случуваат вакви трагедии.