Денеска до Основното јавно обвинителство ги доставивме документите во врска со случајот „диво месо“, „канцер мафија“ на Онкологија, онака како што најавивме, изјави денеска портпаролот на ВМРО-ДПМНЕ, Наум Стоилковски. Тој рече дека е страшно што и по три месеци наводна работа на предистрага, нема оформен предмет во Основното јавно обвинителство и не е започнат процес за „диво месо“, а мафијата уште функционира.
-Никој таму не е опфатен со некаков процес со кој што би бил отстранет од работата. Јасно е дека зад ваквото однесување стои политичка одлука, СДС веднаш застана зад „канцер мафијата“ по објавувањето на документите доставени од укажувач во ВМРО-ДПМНЕ. Сето тоа се гледа и од односот со и кон работата на комисијата во Собранието, потенцира Стоилковски.
Тој додаде дека до ОЈО се предадени документи доставени од укажувач коишто посочуваат:
- Дека и покрај скапите договори, не била доставувана навремено терапијата за болните кои што се третирале на Клиниката, никој не ги предупредил оние кои што требаа да ја испорачаат и никој за тоа не одговарал, односно за работата на омилената фармацевтска куќа на власта.
- Дека се создавале можеби фиктивни вишоци на лекови и терапии, тие биле нарачувани, а пациентите сепак не ги добивале.
- Докази дека никој не водел евиденција каде и како завршувал вишокот од секоја отворена вијала, пакување, со што постојат сомнежи дека вишокот завршувал надвор од болницата.
- Дополнително терапијата била давана на пациенти во торбички на пациенти за да се искористат во приватни установи, а била наплаќана услуга како да била аплицирана во Универзитетската клиника!
-Очекуваме дека сепак кај Јавното обвинителство ќе проработи човечноста и спротивно на поддршката од власта за „канцер мафијата“, ќе отпочнат со сериозност кон случајот „диво месо“ на Онкологија. Се работи за „канцер мафија“, „диво месо“ кое што го уништува здравствениот систем на сметка на животите на пациентите, рече портпаролот.
