Премиерот Заев во текот на оваа недела ќе има уште една средба со Алијанса за Албанците и Алтернатива, двете партии кои ја блокираат работата на Собранието, условувајќи ја со донесување на нивниот закон за државанство.
Утревечер премиерот прво ќе има состанок со министрите за внатрешни работи и за правда и другите институции на кој ќе се разгледуваат сугестиите од овие две партии во врска со овој закон.
-Свесни се за нашата инклузивност во процесот и за нашето прифаќање на сугестии. Аргументациите кои беа дадени на маса се прифатливи, а тие ги разбраа и аргументациите на извршната власт кои им беа дадени пред нив како пратеници, изјави денеска Заев, одговарајќи на новинарско прашање дали е можно решение.
Ова ќе биде втора средба на премиерот и претставниците на двете партии. По минатата средба и обете страни изјавија дека се на половина пат до решение.
Но, пратениците на овие две партии прво со стотици амандмани, а потоа и со долги дебати во Собранието го оддолжија изјаснување по измените на Ззаконот за попис, со кои тој се одложува за септември, а беа договорени на средбата на лидерите на СДСМ и ВМРО-ДПМНЕ, со што Села и Гаши не се согласуваат.
Заев денеска апелираше до двете партии да ги повлечат амандманите за да се одблокираат сите закони од пакетите антикризнимерки.