Поддржувачите на Алексеј Навални денеска ќе ја одбележат втората годишнина од неговата смрт, објави ДПА.
Навални, еден од најистакнатите критичари на рускиот претседател Владимир Путин, почина на 16 февруари 2024 година во казнена колонија во Арктичка Русија.
Неговиот тим, кој работи во егзил, соопшти дека се планирани комеморативни настани во Русија и во повеќе од 20 други земји. Во Германија, собири ќе се одржат во десетици градови, меѓу кои Берлин, Хамбург и Лајпциг.
Во Москва, граѓаните можат да положат цвеќе на неговиот гроб, но јавните собири во Русија се забранети.
Сопругата на Навални, Јулија Навалнаја, го обвини рускиот претседател за убиство на нејзиниот сопруг. Германија, Шведска, Холандија, Франција и Велика Британија соопштија дека анализите на останките пронашле траги од токсин наречен епибатидин. 
Во заедничкото соопштение, објавено на Минхенска безбедносна конференција, се наведува дека со оглед на високата токсичност на супстанцијата и пријавените симптоми, труењето е многу веројатна причина за смртта.
Русија претходно соопшти дека Навални починал од природна смрт. Засега не е јасно како примероците од ткивата завршиле во западни лаборатории.
Амнести интернешнал повика на независна и темелна истрага за околностите околу неговата смрт.
