Играниот филм „Диџеј Ахмет“, режисерско деби на Георги Унковски, ја имаше својата европска премиера во „Синема галери“ во Брисел, каде присуствуваа претставници на европските институции, дипломати, филмски професионалци и љубители на филмот, информира Министерството за култура и туризам.
Пред проекцијата се обрати министерот за култура и туризам Зоран Љутков, кој нагласи дека прикажувањето македонски филм во Брисел претставува значаен успех и потврда за квалитетот на домашната кинематографија.
„Филмот може да биде длабоко локален по својата приказна, а истовремено универзален по емоцијата и пораката што ја носи“, истакна Љутков.
Министерот упати пофалби до авторскиот и продуцентскиот тим, оценувајќи дека „Диџеј Ахмет“ достоинствено ја претставува државата на европската сцена и сведочи за зрелоста и креативната храброст на македонската кинематографија.
Тој потенцираше дека филмот е резултат на меѓународна соработка и доверба меѓу партнерските институции, нагласувајќи ја важноста на копродукциите како можност за отворање нови пазари и публика за малите национални кинематографии. 
По проекцијата се одржа панел-дискусија посветена на улогата на копродукциите во европскиот аудиовизуелен сектор.
Од Министерството посочуваат дека настанот претставува уште една потврда за активното присуство на македонската култура во европскиот културен простор и за продлабочувањето на соработката со европските партнери.
