Првиот вицепремиер Артан Груби и Владата денес ги промовираа новите тријазични полициски униформи и автомобили кои покрај македонски и англиски испишани се и на албански јазик. Груби на Фејсбук се пофали со новите униформи на полицијата.
– Уште една успешно завршена мисија, како што ветивме. Веќе се спроведуваат во пракса измените на Уредбата за употреба на албанскиот јазик во полициските униформи и нивните симболи кои ги усвоивме претходно на владина седница, објави Груби на својот фејсбук профил.
Со ова стапува во сила Уредбата за униформата и ознаките на униформата на полицијата која Владата ја донесе пред една година врз основа на Законот за употреба на јазиците, во главниот град Скопје и во другите општини каде што живеат најмалку 20 отсто граѓани од заедниците.
Во Градот Скопје, во општините во Градот Скопје и во општините во кои најмалку 20 отсто од граѓаните зборуваат службен јазик различен од македонскиот јазик, ознаките на основната униформа ќе бидат тријазични.
Се уште е нејасно како ќе се применува оваа уредба и дали тријазичните униформи ќе бидат применети само во оние општини каде што етничките заедници се над 20 проценти или на ниво на цела држава.
