Постоење на приватни проблеми коишто му се одразуваат на играта го призна Лука Дончиќ, кошаркар и лидер на амариканскиот НБА тим Далас Маверикс. Тој беше многу блиску до трипл-дабл учинок (34 поени, 10 скока и 8 асистенции) на пресметката против Шарлот Хорнетс, но и тоа негово издание не беше доволно домаќините да бидат подобри.
Словенецот се појави на натпреварот со маица со интересен натпис (Се што ми треба е суво месо и ракија) кој насмеа многу луѓе во публиката. Но, по натпреварот тој изјави дека се соочува со одредени проблеми во прватниот живот кој го спречуваат да биде среќен, ужива во играта.
-Јас сум толку фрустриран. Мислам дека на сите ви е јасно кога ќе ме видите на теренот. Во последно време се чувствувам како да не сум јас, туку дека само стојам на теренот … порано уживав во тоа и се смеев во играта, но сега сум толку фрустриран од многу причини, не само кошаркарски. Многу тоа ми се случува надвор од теренот што е поголемо од кошарката, но не сакам да зборувам за мојот приватен живот, истакна Дончиќ кој посочи дека мора како тим да се борат пожестоко.