Од пред две недели требаше да се намалат цените на неколку основни прехранбени продукти. Така вети Владата, а и даде народни пари за субвенции за да тоа се случи. Ама…
Од вчера пак Државниот пазарен инспекторат има нов директор. Владата ја разрешила Анета Симеска – Димоска, а за нов раководител го назначила Горан Трајковски, актуелен претседател на општинската организација на СДСМ во Кисела Вода. Ќе промени ли тоа нешто во цените на прехрамбените продукти?
Кои беа причините за разрешувањето на Симеска-Димоска, која на чело на ДПИ дојде во мај минатата година, не беше кажано. Така, останува енигма дали тие треба да се бараат во резулататот од контролите и неуспехот да се намалат цените на основните прехрамбени производи од почетокот на месецов. Таква задача Државниот пазарен инспекторат доби на крајот од ноември од страна на министерот за економија Крешник Бектеши откако Владата обезбеди субвенционирана и поевтина електрична струја за фирмите од областа на прехрамбената индустрија. Министерот Бектеши тогаш беше категоричен дека од 1 декември ќе има намалување на цените од 5-10-12… проценти и дека пазарните инспектори ќе вршат засилени контроли.
– Државниот пазарен инспекторат ја има целата листа на компании од прехранбената индустрија кои ЕСМ ќе ги снабдува со струја по поевтина цена и, согласно тоа, инспекторатот ќе врши засилени контроли во маркетите, истакна Бектеши.
Но, од оваа најава немаше речиси никакви резултати. Со исклучок на маслото цените на речиси сите останати прехрамбени производи – лебот, млекото… останаа скоро непроменети и високи и по половина месец откако производителите ја користат евтината струја. Контролите на ДПИ како вооопшто да немаа ефект и цените останаа исти. Наместо одговор зошто е тоа така, зошто производителите и трговиците не ги поевтинуваат артиклите, министерот Бектеши вчера даде ново, сосема поинакво, објаснување.
-Кажавме дека очекуваме да има намалување на цените од 7 до 12 отсто, но тоа не е возможно да се случи моментално. И до 1 декември супермаркетите не биле празни и имале производи кои биле набавени по повисоки цени. Во нивните магацини имаа залихи на производи, и домашни производи кои користат дистрибутер и производи кои се увезуваат во нашата држава. Тие залихи се набавени со различни цени, појасни Бектеши.
Дали „оваа недела или на почеток на наредната“ ќе се потрошат залихите за да се случи намалувањето на цените? Прашањето е сега кој ќе исконтролира дали се потрошени залихите или тоа „објаснување“ и натаму ќе се користи за да цените останат високи и да се профитира врз грбот на граѓаните кои ја плаќаат и субвенционираната струја за производителите? Ете ја и дополнителната задача за новиот директор на Државниот пазарен инспекторат.
