Вратите во Чифте амам при Националната галерија во Скопје, деновиве се отворени за сите љубители на уметноста. На изложбата на дела од 54-тата Светска галерија на карикатури на Остен и на Остен биенале на цртеж Скопје 2022, беше и претседателот на Македонија Стево Пендаровски.
-Благодарение на селекција на дела во рамки на 54. Светска галерија на карикатури имаме можност да се запознаеме со врвни светски карикатуристи и да добиеме увид во актуелните случувања во една од најкомплексните и според некои, најхрабрите жанрови во визуелните уметности, изјави Пендаровски во обраќањето.
Тој додаде дека со вештината за цртање и длабочината на пораката, низ само еден цртеж, изразуваат ставови и пораки кои се вистински „остен“ што боде онаму каде што најмногу боли, во општествените рани, ослободувајќи го човештвото од лагата и лицемерието.
– Колку карикатурата со својата хумористична димензија ни помага да ја разбереме и надминеме непријатната реалност што владее во светот? Која алатка ни останува да го подобриме светот и да се подобриме себе си? Несомнено тоа се прашања блиски на оние кои ги поставува и карикатурата. Одговорите се наоѓаат во нашата подготвеност и нашата храброст да си ги поставуваме тие прашања себе си на другите и на заедницата. Несомнено, како и многу други уметнички и културни случувања, имаме обврска да ја негуваме и поддржуваме Светската галерија на карикатури, додаде Пендаровски.
По ова убаво објаснување сепак остана недоречено, дали претседателот смета дека некогаш и самиот дава повод за добра карикатура и колку тој ги прифаќа многуте пораки од карикатури кои се појавуваат во Македонија за време на неговото владеење.
Инаку, на настанот беа доделени наградите за најуспешните автори, како и признанија на партнери и соработници на Остен, а денес во претседателскиот Кабинет ќе биде поставена изложба на најуспешните карикатури од досегашните 54 изданија на Светската галерија на карикатури.