Внатрешната контрола при Министерство за внатрешни работи утврдила пропусти во постапувањето на дури 39 полициски службеници во случајот со Ивана, која заедно со својата малолетна ќерка го загуби животот по пад од зграда.
Како што информираат од МВР, пропустите се однесуваат на постапувањето по претходни пријави за семејно насилство, кои биле поврзани со овој случај.
Одделот за внатрешна контрола, криминалистички истраги и професионални стандарди веќе доставил известување до надлежното обвинителство, кое ќе ја испитува евентуалната одговорност кај полициските службеници.
Предметот е проследен до Обвинителството за гонење организиран криминал и корупција, каде што ќе се утврдува дали постои основ за кривична одговорност за начинот на кој било постапувано по пријавите.
Инаку, според претходните информации, во семејството имало повеќе пријави за насилство во подолг временски период, по кои постапувале различни полициски службеници.
