До Антикорупциската комисија не е доставен целиот договор со американско-турскиот конзорциум „Бехтел и Енка“ за изградба на Коридорите 8 и 10д, изјави денеска вицепремиерот и министер за политички систем и односи меѓу заедниците Артан Груби. Тој објасни дека причина за тоа е постоењето на клаузулата за доверливост.
– Согласно договорот што е потпишан, има клаузула за доверливост. За да се достави до медиумите, Собранието и до ДКСК или која било друга институција, освен Јавното обвинителство, мора да има согласност од двете страни, односно од Владата и од конзорциумот „Бехтел и Енка“. Тие ни доставија редактирана верзија којашто е доставена до ДКСК за разгледување, изјави Груби, одговарајќи на новинарски прашања на почетокот на градежните активности за изградба на Коридорот 8.
Целосната верзија од договорот, како што изјави Груби, е доставена само со Јавното обвинителство.
