Леброн Џејмс уште еднаш покажа зошто важи за еден од најдобрите на сите времиња, откако ги предводеше Лос Анџелес Лејкерс до пласман во второто коло од плејофот на Западот.
Во шестиот и одлучувачки натпревар против Хјустон Рокетс, Лејкерси славеа убедлива победа од 98:78, а Џејмс постигна 28 поени и беше лидер на теренот. Во отсуство на повредениот Лука Дончиќ во текот на целата серија, искусниот кошаркар повторно ја презеде одговорноста и го однесе својот тим понатаму.
Покрај Џејмс, одличен настап имаше и Руи Хачимура со 21 поен, додека кај Хјустон се истакнаа Амен Томпсон со 18 и Алперен Шенгун со 17 поени.
Во следната рунда Лејкерси ги очекува далеку потежок предизвик против актуелниот шампион Оклахома Сити Тандер.
Во останатите натпревари, Торонто Репторс изборија мајсторка по драматична тројка на Ар Џеј Берет, додека Детроит Пистонс израмнија на 3-3 во серијата со Орландо Меџик по убедливата победа од 93:79.
