Мажот обвинет за убиство поради неговата наводна улога во пукањето во кое во 1996 година беше убиена хип-хоп легендата Тупак Шакур, не успеа да го поништи клучниот доказ во постапката.
Двејн „Кефе Ди“ Дејвис тврдеше дека доказите биле набавени преку незаконски ноќен претрес, но судијата го одби барањето на рочиштето во вторникот, пренесува „Ролинг Стоун“.
Неговите адвокати во поднесоците наведуваат дека Дејвис е пензиониран дедо и преживеан од рак, кој „учтиво соработувал“ кога детектив тропнал на неговата врата во текот на денот, пред претресот извршен во јули 2023 година.
Одбраната тврди дека полицијата направила „стратешки пропусти“ кога во барањето за налог за претрес го претставила Дејвис како „повеќекратно осудуван престапник“ со претходно апсење за оружје.
Според адвокатите, Дејвис ја напуштил трговијата со дрога во 2008 година и потоа една деценија работел законски, како инспектор во рафинерија за нафта.
Дејвис се изјаснил дека не е виновен по едно обвинение за убиство и се наоѓа во притвор без можност за кауција во притворскиот центар во округот Кларк во Лас Вегас.
Обвинителството тврди дека тој го организирал нападот од возило во движење во кој беше убиен Шакур и го обезбедил оружјето со кое бил ранет и Суге Најт, коосновач на издавачката куќа „Дет Роу Рекордс“, кој тогаш управувал со автомобилот по булеварот во Лас Вегас.
Властите наведуваат дека нападот бил одмазда откако Шакур неколку часа претходно се тепал со Орландо Андерсон во казино на 6 септември 1996 година.
Во интервју со органите на редот во 2008 година, Дејвис изјавил дека Шон „Диди“ Комбс, основач на „Бед Бој Рекордс“, понудил 1 милион долари (околу 740.000 фунти) за да бидат убиени Најт и Шакур во рамки на тогашната расправија.
Комбс остро ги негира овие наводи.
