Премиерот Христијан Мицкоски остварил телефонски разговор со претседателот на Обединетите Арапски Емирати, шеикот Мохамед бин Зајед Ал Нахјан, во кој разговарале за актуелната безбедносна состојба и ескалацијата на тензиите на Блискиот Исток.
Во разговорот, Мицкоски изразил искрена солидарност со народот на ОАЕ и упатил најдлабоко сочувство до семејствата на жртвите од неодамнешните напади. Тој нагласил дека нападите врз суверени држави и заканите кон цивилното население претставуваат грубо нарушување на меѓународното право и сериозна закана за регионалната и глобалната стабилност.
Премиерот посочил дека Македонија, како членка на НАТО и стратешки партнер на САД, останува цврсто посветена на принципите на суверенитет и територијален интегритет, додавајќи дека во услови на зголемена неизвесност неопходни се координација со сојузниците, одговорност и заеднички напори за спречување понатамошна ескалација.
Воедно, Мицкоски информирал дека државните институции се целосно мобилизирани и внимателно ја следат состојбата, со подготвеност за навремена помош, поддршка и евентуална асистенција за македонските граѓани кои се наоѓаат во регионот доколку тоа биде потребно.
