Средната оценка на екстерните испити од прелиминарните резултати е 3,78 и е повисока во однос на минатата година кога изнесуваше 3,61, информира денеска Државниот испитен центар (ДИЦ), кој резултатите ги објавува 12 дена порано од законскиот рок.
Првичните резултати од двата екстерни испита од годинашната државна матура се пратени до училиштата, а денеска напладне ги објави и и секој кандидат може да ги види своите, електронски со најава на http://rezultati.edu.mk.
-Следува период на приговори, а заклучно со 5 јули учениците може да поднесуваат приговори во училиштата. Резултатите од приговорите ДИЦ ќе ги објави на 11 јули. Увидот во тестовите лично од кандидатите ќе биде на 13 јули во ДИЦ со претходна најава и закажување термин телефонски на 12 јули, велат од ДИЦ.
За дополнителни информации матурантите може да се информираат од училишните матурски комисии во своите училишта и на www.matura.gov.mk.
Државната матура оваа година се реализираше во согласност со договорот со средношколците, односно два екстерни, два интерни предмети и проектна задача и скратени испитни програми. Првиот екстерен и задолжителен испит – Мајчин јазик и литература (македонски, албански или турски јазик) кандидатите го полагаа на 4 јуни, а на 13 јуни го полагаа вториот екстерен испит, кој е изборен од предметите математика, странски јазик (англиски, француски, германски или руски), естетика и филозофија.
За полагање на државната матура во јунската сесија беа пријавени 15 899 кандидати (7135 од гимназии, 8504 од стручни и 260 од уметнички училишта)
