Невладини организации и активисти алармираат за сечењето на шумите и уништувањето на зеленилото во Скопска Црна Гора. Не само тие, штетата што последниве недели е направена на планината е видлива и за секојдневните шетачи кои фотографираат и ставаат на своите социјални мрежи во обид да ги разбудат „Македонски шуми“, но и шумската полиција да реагираат соодветно. Но, никој од таму до сега не објаснил што се случува на планината.
– Кој да ја „пошуми“ свеста на Македонски шуми?! Каде сте, ало?! Се слушаме ли? Сотрена е Скопска Црна Гора и вие ќе преземете ли нешто во врска со тоа?, прашува Мирко А.
– Цел Љубански преслап го исекоа, а околу Бањански преслап се пробиваат нови патишта за сеча на дрва. Пред 2-3 недели поминавме покрај Калеш мара и некои диви дрвосечачи го испосекле местото каде што се клупите и длабоката сенка ја нема. Исто е околу Арачиново и над Брњарци, додека се движевме по патеката нагоре се слушаа моторни пили кои сечеа млади стебла, вели Дејан Вељанов и се надева дека „Македонски шуми“ ќе реагира.
Еко-познавачите тврдат дека пошумувањето не може да се направи со елки и борови, како што некогаш најавило претпријатието, оти тие таму не вирееле.
-Таква вегетација не е соодветна на поднебјето, на надморската височина, на почвата на таа планина. Да беше, ќе имаше и автохтона шума на зимзелени дрвја, но нема, колку што ми е мене познато никаде на Скопска Црна Гора. Само бука и даб, вели Југослава Дуковска, еко-активист за дел од медиумите.
Останува енигма што ќе преземе „Македонски шуми“. До овој момент не се одзва да објасни, можеби ја чека пролетта за да се разбуди од зимскиот сон. А уште поважно е што ќе преземе полицијата за да се спречи дивото сечење на дрвја.
