Во голема полициска акција утрово е приведен Филип Андонов -Сокол, поранешен директор на КПУ Затворот во Шуто Оризари и Сашко Крстевски – Ѕверот, заповедник во истиот затвор, кој од пред неколку месеци е во пензија. Приведени се и повеќе поранешни и сегашни вработени во затворите кои работеле незаконски и биле дел од криминална мрежа, потврдуваат од Управата за спроведување санкции.
Сите се приведени поради сомневања за злоупотреба на службената положба и овластувања и овозможување бегства на затвореници и соизвршителство.
-Уште кога стапив на должност во Управата за спроведување санкции, пред 8-9 месеци веднаш спроведовме контроли за работењето во казнено-поправните установи и беа констатирани злоупотреби во работењето на некои од раководниот кадар во затворите. Сознанијата од контролата беа веднаш доставени до МВР и Обвинителството, а во оваа акција се приведени некои од тие за кои имавме констатирано злоупотреби при контролата. Еве почнуваат да се докажуваат сомнежите за нивните злоупотреби, а контролите на работењето во затворите и понатаму ќе продолжат, вели директорот на Управата за санкции, Александар Пандов.
Од Обвинителството за гонење органииран криминал и корупција, известуваат дека акцијата е во тек.
-Под раководство на јавен обвинител од Специјализираното одделение за гонење на кривични дела сторени од лица со полициски овластувања и припадници на затворската полиција при Основното јавно обвинителство за гонење на организиран криминал и корупција по Наредба на судија на претходна постапка полициски службеници од Одделот за сузбивање на организиран криминал и корупција при МВР извршуваат претреси на локации во Скопје. Подетални информации во текот на денот, велат од ОЈО ГОКК.
