Франција е принудена да затвори седум училишта поради наезда на стеници, објави министерот за образование Габриел Атал. – Бубачки во кревет се откриени на различни нивоа во 17 институции, а во моментов додека зборувам со вас, седум училишта се затворени поради таа причина, изјави Атал за телевизијата Франс 5.
Ситуацијата доведе до серија владини состаноци оваа недела за да се истражи зголемениот број пријавени случаи на бубачки, што доаѓа додека Франција е домаќин на Светскиот куп во рагби и се подготвува за Олимпијадата во Париз во 2024 година.
Министерството за образование претходно во петокот соопшти дека се затворени пет училишта со вкупно 1.500 ученици. Претходно во текот на неделата, властите соопштија дека две училишта, едното во Марсеј, а другото во Вилфранш-сур-Сон надвор од Лион во југоисточна Франција, се затворени поради чистење.
Атал нагласи дека одговорот на оваа ситуација е итен, за да може да се обезбеди реакција во рок од 24 часа. Во соработка со Министерството за здравство и регионалните здравствени агенции, подготвена е листа на „одобрени и признати“ компании за да може директорите на училиштата брзо да интервенираат.
Градоначалничката на Амиен, Брижит Фур, најави повторно отворање на општинската библиотека во сабота, откако неколку дена беше затворена поради откривање на бубачки во јавните читални.
Се проценува дека 10% од сите домаќинства во Франција имале проблеми со креветските бубачки во последните неколку години, што бара операција за контрола на штетници која чини неколку стотици евра и често мора да се повтори.
Инсектите што цицаат крв се забележливи во париското метро, брзите возови и на аеродромот Шарл де Гол во Париз. Сепак, властите не потврдија поединечни случаи, а истрагата на парискиот транспортен оператор РАТП не открила бубачки на неговите услуги, објави ТВ РМЦ.
