Министерството за внатрешни работи води активна истрага за случајот со врсничко насилство во Ѓорче Петров врз шестоодделенка од страна на три други ученички и повикани се на разговор 14 лица, а за дел од нив следат процесни дејствија, изјави министерот Панче Тошковски.
Во рамки на предметот е вклучено и Јавното обвинителство и се постапува по насока на надлежен јавен обвинител. Запознаен сум дека се води истрагата, ова е сериозен проблем кој не засега сите, рече Тошковски.
И народниот правобранител за грозоморниот случај отвори предмет по сопствена иницијатива, од каде бараат итна институционална реакција. Ваквите настани представуваат тежок облик на повреда на правата и достоинството на детето и укажуваат на сериозни слабости во системот на превенција и заштита од насилство во училиштата па повика да се обезбеди целосна, навремена и координирана заштита на детето жртва, како и да се утврдат сите околности и евентуални пропусти.
