Не стивнуваат реакциите откако министерката Мила Царовска вчера најави дека, по примерот на Финска, предметот „Историја“ практично ќе оди во историјата, односно ќе се преточел во „општествени науки“. Пораки стигнуваат од читателите на „Скопско ехо“ не само од Скопје и Македонија, туку и од надвор.
Речиси и да нема позитивна реакција, особено заради чувствителноста на периодот во кој се наоѓа државата, што пак вчера резултираа со и официјално вето од Софија.
Настрана од политиката, има и реакции чија цел е да се покаже дека во Финска предметот „историја“ си постои засебно. Па така ако се отвори на страната на финскиот образовен систем: www.oph.fi „историја“ стои како посебен предмет во основното образование, наведен меѓу останатите, но и со опис детален за тоа која е целта на изучувањето на истиот.
Меѓу коментарите доминираат и такви дека не може и не смее да се става во иста реченица македонскиот и финскиот модел на образование: првиот постојано мета на критики и во состојба на постојана недоразвиеност, а вториот прогласен за најдобриот во светот.
Но, сепак најмногу реакции има дека ова е уште еден слугарски потег на власта кон соседите кои сакаат ние да немаме историја, а нашите деца да учат дека се никој и ништо.
