Американскиот претседател Доналд Трамп му се закани на Иран дека ќе „живее во пекол“ ако до вторник до 2 часот по средноевропско време не постигне договор за повторно отворање на Ормутскиот теснец, клучна поморска рута низ која минува околу петтина од светската нафта.
Ова е најновиот, во редот ултиматумите што Трамп ги даде до Иран.
Првата закана ја упати на 21 март, кога изјави дека САД ќе „нападнат и уништат“ ирански енергетски објекти ако Иран во рок од 48 часа не го отвори теснецот. Два дена подоцна, непосредно пред истекот на рокот, Трамп изјави дека САД и Иран воделе „продуктивни разговори“ и ги одложи можните напади за пет дена.
На 26 март, рокот дополнително го продолжи за десет дена, наведувајќи дека Иран побарал повеќе време, со што новиот краен рок стана 6 април.
Вчера, Трамп повторно ја засили реториката: „Сетете се кога му дадов на Иран десет дена да ПОСТИГНЕ ДОГОВОР или да го ОТВОРИ ОРМУСКИОТ ТЕСНЕЦ. Времето истекува – 48 часа пред врз нив да се сруши пеколот“, напиша тој.
Истовремено Трамп врши притисок и врз европските сојузници да се вклучат во напорите за повторно отворање на поморскиот пат, но тие одбиваат да се вклучат во конфликтот.
Од Техеран тврдат дека Теснецот е затворен само за непријателски држави, а комплетно ќе се ослободи за пловидба, откако ќе им се исплати воена отштета.
Во меѓувреме преку посредниците Пакистан и Египет се водат дипломатски обиди да се стави крај на конфликтот, но се водат и жестоки меѓусебни ракетирања.
