Нов успех на светски натпревари забележаа македонските средношколци. Напиот тим сега освои едно сребро и една бронза на Хемиската олимпијада, што се одржа во Ријад, главниот град на Саудиска Арабија. Средношколецот Петар Мирчевски од прилепската гимназија „Мирче Ацев“ се закити со сребрен медал, додека неговиот врсник Марио Ванчоски од штипската гимназија „Славчо Стојменски“ го освои третото место. Ова е прво сребро за Македонија на светскиот натпревар.
Блиску до медали биле и останатите македонски натпреварувачи, Иван Костевски од гимназијата во Штип и Елена Живаљевиќ од ПСУ „Јахја Кемал“ во Скопје.
-Со менторите од Скопје и со професорите од нашите училишта долго време се подготвувавме за сите претходни, а најмногу за овој светски натпревар и она што го најавивме го остваривме, а тоа е дека ќе сториме сѐ да бидеме на врвот на светската хемија“, рече Ванчоски.
Тој минатата година освои бронзен медал и на Олимпијадата по хемија во Цирих, во конкуренцџија на 350 учесници од 90 држави.
Ментори на нашиот тим се професорите д-р Миха Буклески и д-р Марина Стефова од Институт за хемија при Природно-математичкиот факултет во Скопје и членови на Сојузот на хемичарите и технолозите на Македонија кои го организираа нашето учество.
