Претседателката Гордана Сиљановска-Давкова денеска во Загреб ќе биде пречекана со највисоки државни и воени почести од хрватскиот претседател Зоран Милановиќ.
Во рамки на официјалната посета на Хрватска, предвидена е тет-а-тет средба меѓу двајцата претседатели, како и пленарен состанок на делегациите на двете држави.
Македонската претседателка ќе се сретне и со премиерот на Хрватска, Андреј Пленковиќ.
Во текот на посетата, Сиљановска-Давкова ќе положи венец на Споменикот на татковината, а во градскиот парк „Бундек“ ќе оддаде почит и на спомен-бистата на Блаже Конески.
Во македонскиот Културно-информативен центар во Загреб, претседателката ќе присуствува на отворањето на изложбата „Архивски документи“ од македонската уметница Жанета Вангели.
Претходно, таа ја посети македонската православна црква „Свети Злата Мегленска“ во Загреб и се сретна со претставници на македонската заедница во Хрватска.
