Во Собранието денеска се крои нов владин состав, а првиот човек на Владата, Димитар Ковачевски и министерот за земјоделство Љупчо Николовски, најдоа време да бидат во македонските ниви и да кројат лозје. Повод за тоа е денешниот голем празник св.Трифун.
Освен што им помогнаа на лозарите министерот и премиерот ветуваат и друга поголема поддршка.
– Ги стимулираме малите семејни винарии, и оваа година обезбедуваме грант од 10.000 евра, државна помош за да инвестираат во своите бизниси. Дополнително, за прв пат ги помагаме и малите дестилерии со грант од 5.000 евра, со кои ќе можат да набават опрема за производство и пакување. Да се радуваме на празникот Св. Трифун уште многу години и да го празнуваме овој ден во духот на традицијата насекаде низ нашата држава каде што се негува виновата лоза, истакна Ковачевски по повод денешниот празник.
И министерот за земјоделство вети поголема поддршка за винариите, а како дополнителен мотив биле досегашните успеси на малите семејни винарии.
– Успехот кој го постигнавме со малите семејни винарии ја одбележа 2022, и за нас беше силен мотив оваа успешна приказна да ја продолжиме. Денес, на винската карта имаме многу нови брендови, нови вкусови, богатство од ароми и комплексни вина произведени од домашно македонско грозје, токму во малите семејни винарии визионерски создадени од мотивирани семејства во чија традиција е производството на вино, истакна Николовски.
Колку ќе биде успешно закројувањето од страна на премиерот и министерот останува да се види. Засега само знаеме и имаме искуство како ја кројат судбината на Македонија.
