Во последно време министерот за внатрешни работи Оливер Спасовски работно шета низ Македонија при што се сретнува и со граѓани. Тоа е добро, за да првиот полицаец во земјава ги дознае на терен проблемите со кои се соочува населението.
Денеска во рамките на проектот ‘Отворен кабинет’ тој ја посетил Крива Паланка каде бил запознаен со безбедносната состојба на подрачјето на СВР Куманово и ОВР Крива Паланка.
-Во согласност со презентираните показатели, безбедносната состојба на подрачјето во надлежност на СВР Куманово и ОВР Крива Паланка е поволна. Вкупниот криминалитет на подрачјето на СВР Куманово во изминатите осум месеци од 2023 година, во споредба со истиот период претходната година, бележи намалување за 17 %. Во делот на класичниот криминалитет бележиме намалување на овој вид кривични дела за 11 %, истакна Спасовски.
Тој информира дека на подрачјето на СВР Куманово во изминатите осум месеци биле издадени повеќе од 19.000 платни налози – казни за сторени прекршоци, од кои најмногу за возачи што управувале возило под дејство на алкохол, а реализирани се 689 превентивни настани на разни теми. На подрачјето на ОВР Крива Паланка во 2023 година, компаративно со истиот период лани, евидентирано е намалување на вкупниот криминалитет за 29 %.
-Во делот на недозволената трговија со дрога и оружје откривачката дејност е зголемена за 33 % во споредба со анализираниот период во 2022 година, информира министерот Спасовски.
