Победникот на изборите на Унгарија, Петер Маѓар, ја критикуваше одлуката на владата на Виктор Орбан да им одобри азил на полските политичари Збигњев Жиобро и Марцин Романовски, кои се товарат за злоупотреба на службената должност.
Тој порача дека Унгарија не смее да биде прибежиште за лица обвинети или осудени за криминал, при што го спомена и поранешниот македонски премиер Никола Груевски.
„И тоа не важи само за нив, туку и за Груевски, поранешниот премиер на Македонија“, изјави Маѓар.
Груевски се наоѓа во Унгарија од ноември 2018 година, откако избега од Македонија непосредно пред да започне издржување на затворската казна. Во Македонија тој е осуден на две години затвор во случајот „Тенк“ за незаконска набавка на луксузен службен автомобил, а против него се водеа и други судски постапки.
Никола Груевски беше премиер на Македонија од 2006 до 2016 година.
